SES-2008 okazos en Modra-Harmónia, Slovakio, en Eduk-centro de Centro de plua edukado de Komenio-Universitato.

La loko estas bela kaj trankvila urbeto, situanta piede de la montaro "Malgrandaj Karpatoj" (Malé Karpaty), 30 km de Bratislavo kaj 25 km de Trnavo. Distanco de la viena flughaveno (Schwechat) al Bratislavo estas ĉ. 45 km kaj la distanco de la budapeŝta flughaveno al Bratislavo estas ĉ 160 km.

Partoprenantoj loĝos en agrablaj dulitaj ĉambroj kun propra duŝejo kaj necesejo. Entute estas ĉambroj por 84 personoj, pliaj 240 personoj povos tranokti en apuda studenthejmo - same en dulitaj ĉambroj. Krome estos ankaŭ eblo tendumi, se oni kunportos proprajn tendojn. La plej fruaj aliĝintoj ricevos plej luksajn dulitajn ĉambrojn, postaj iomete malpli luksajn dulitajn ĉambrojn, kaj plej malfruaj aliĝintoj loĝos en ĉambroj en la studenta hejmo.

Ejo, kie okazos la programo, havas plurajn stud- kaj preleg-ĉambrojn, komputilejon kun reto kaj eblo uzi proprajn porteblajn komputilojn; sendratan reton en teretaĝo de la tuta studejo, kongresejon kun podio, projekciilo kaj piano; TV-ĉambron, etan sportejon, endome lokon por ludi bilardon kaj tablotenison, kaj ekstere tenisejon, ludejon por minifutbalo kaj terason kun rostilo. Tuj apud la ejo troviĝas tutnokte malfermita trinkejo kaj proksime estas ankaŭ diskejo kun keglejo.